Desde a Fundación Terra Termarum Castrolandín queremos convidarvos a participar nun novo Obradoiro de Cerámica Castrexa, unha actividade práctica coa que nos achegaremos á tradición cerámica da Idade do Ferro e á cultura castrexa a través do barro, das formas e das técnicas de elaboración.
O obradoiro celebrarase no Centro Arqueolóxico do Barbanza, onde descubriremos diferentes técnicas tradicionais de modelado e decoración cerámica, tomando como referencia as formas, os acabados e os motivos decorativos documentados nas pezas arqueolóxicas da cultura castrexa.
Ao longo da xornada, as persoas participantes poderán experimentar directamente co barro e coñecer de maneira práctica o proceso de creación dunha peza de cerámica castrexa. Cada participante elaborará a súa propia peza, seguindo as técnicas e modelos empregados no noso Obradoiro Experimental de Cerámica Castrexa de Castrolandín.
E a experiencia non remata aquí. Unha vez finalizado o obradoiro, coceremos posteriormente as pezas nas instalacións do Obradoiro da Fundación Terra Termarum, para que cada participante poida recoller e levar consigo a súa creación: unha peza única feita coas súas propias mans e inspirada no noso patrimonio castrexo.
A actividade está especialmente dirixida a persoas adultas e contará cun aforo limitado a 12 prazas, para garantir un acompañamento próximo durante todo o proceso e favorecer unha experiencia práctica e personalizada.
📅 Información da actividade
Lugar: Centro Arqueolóxico do Barbanza
Horario: de 10:30 a 14:00 h e de 16:30 a 19:00 h
Duración: 6 horas
Destinatarios/as: persoas adultas
Aforo: 12 prazas
Unha oportunidade para poñer as mans no barro, coñecer a cerámica castrexa desde dentro e experimentar en primeira persoa como se recuperan e recrean técnicas e formas do noso pasado.
Agardámosvos no Centro Arqueolóxico do Barbanza!
